«Қазақстанның Даму Банкі» АҚ («Бәйтерек» холдингінің еншілес ұйымы, бұдан әрі – Банк, ҚДБ) Жамбыл облысында натрий цианидін өндіретін зауыт салу жөніндегі инвестициялық жобаны қаржыландыруға кірісті. Қаржыландыру «Алтыналмас АК» АҚ еншілес компаниясы «AltynalmasReagents» ЖШС-мен жасалған кредиттік желіні ашу туралы келісім аясында жүзеге асырылады.
Қаржыландырудың ашылуы Қазақстан-Германия Іскерлік кеңесінің 16-шы отырысына тұспа-тұс келіп, Мемлекет басшысы Қ.Тоқаевтың 2023 жылы Euler Hermes агенттігінің басқарма мүшесі Эдна Шёнемен кездесуі нәтижесінде қол жеткізілген уағдаластықтардың қисынды жалғасы болды. Сол кезде Қазақстанның Даму Банкі мен Landesbank Hessen-Thüringen Girozentrale (Helaba) арасында аталған жобаны іске асыру бойынша қаржылық ынтымақтастықтың негізі қаланған.
ҚДБ тарапынан қарыз сомасы 98,8 млн еуроны құрайды, ол құрылыс-монтаждау жұмыстарына және жабдық сатып алуға бағытталатын болады. Қарыз алушының өз қатысуы – 33,2 млн еуро. Жобаны қаржыландыру мерзімі – 10 жылға дейін.
Жобаны іске асыру аясында Glatt Ingenieurtechnik GmbH неміс компаниясын тарту көзделіп отыр, ол базалық жобалауды, жабдықты жеткізуді, құрылысты бақылауды, сондай-ақ объектіні пайдалануға беруді және жобалық көрсеткіштерге қол жеткізуде сүйемелдеуді жүзеге асыратын болады. Кәсіпорында химиялық өндіріс саласындағы әлемдік көшбасшы – DuPont лицензияланған технологиясы қолданылады.
Мемлекет басшысы Қасым-Жомарт Тоқаев өткен жылы «Қазақстан-Германия» бизнес-форумында Қазақстанда неміс өндірістерінің болуы елдің өнеркәсіптік ландшафтына озық технологияларды енгізуге ықпал ететіндігін атап өткен.
Зауыт «Jibek Joly» (бұрын – «Тараз химиялық паркі») еркін экономикалық аймағының аумағында салынуда, оның негізгі мақсаты – заманауи және экологиялық қауіпсіз технологиялар негізінде қосылған құны жоғары химиялық өнімдердің жаңа өндірістерін дамыту.
Зауыттың күтілетін қуаты – жылына 25 мың тонна. Зауыт өңірлік дамуға мультипликативті әсер етеді: жаңа жұмыс орындары ашылып, ірі өндірістік кәсіпорынға тауарлар мен қызметтерді жеткізу есебінен шағын және орта бизнесті дамытуға серпін бермек. Құрылыс кезеңінде 200-ге дейін жұмыс орнын, өндіріс іске қосылған сәттен бастап жергілікті тұрғындар үшін 108-ге дейін жаңа жұмыс орнын құру жоспарлануда. Зауыт 2027 жылы іске қосылады деп жоспарлануда.
Натрий цианиді – алтын өндіруде қолданылатын негізгі және маңызды химиялық реагент. Жаңа жоба импортты алмастыруға және ел ішіндегі құнды дамытуға бағытталған. Кәсіпорын «Алтыналмас АК» АҚ мен Қазақстанның ішкі нарығының қажеттіліктерін толық қамтамасыз етеді, сондай-ақ өз өнімдерін Өзбекстан, Моңғолия, Тәжікстан, Қырғызстан нарықтарына экспорттайды.
Жоба аясында жергілікті өндірістің қосалқы жабдықтарын, технологиялық сыйымдылықтарын және стандарттан тыс жабдықтарды барынша оқшаулау және қолдану көзделеді.
Жоба ірі қазақстандық кәсіпорындарға жеткізілетін аммиак пен каустикалық сода сияқты бірқатар химиялық қосылыстарға қосымша сұраныс тудырып, химия өнеркәсібінің дамуына қуатты серпін береді.
